Sinopsia

Izenburuko aitorpen soil eta apal horrekintxe hasten da liburua. Lotsaz, beldurrez, ohitura-faltaz isiltzen ditugun kontu horietakoa da berez, baina Joxe Aranzabalek bere burua biluzik erakustea erabaki zuen, gauzak naturaltasun osoz kontatzea, eta horren ordaina elkartasun-uholde bat izan zen, jende askoren berotasuna, lagunen nahiz ezezagunen besarkadak.

Gertakariekin batera Internet bidez plazaraturiko kronika hau osorik eskaintzen digu orain egileak, liburu moduan. Lekukotasun eder bezain gordina, pertsona batek -zientziaren laguntzaz, etxekoen babesaz eta bere borondatearen indarrez- gaixotasunaren kontra egindako borroka erakusten diguna, bizitzaren aldeko aldarria.

Gauzak zintzo eta sinple kontatzeak daukan indarra frogatzen digu obra honek, baina baita kazetari senezko batek, egoerarik aldrebesenean ere, komunikazioaren alde egindako hautua, irakurleak emozio isilez eskertzen jakingo duena.

Aranzabalen kronikekin batera, bere garaian jaso zituen erantzunetatik esanguratsuenak ere bildu ditugu liburuan, eta horrez gain kolaborazio bi: Mikel Irizarren hitzaurrea, gaixoa eta gaixoaldia hurbiletik ezagutu dituenaren lekukotasuna dakarkiguna, eta Luis Fernandezen hitzatzea, kasu honek euskal komunikabideen historian izandako garrantzia azpimarratzen duena.