Sinopsia

Musika klasikotik rockera edo pintura akademikotik pop art-era bezala, halako salto bat egiten du Xabier Etxaniz Rojok liburu honetan: obra mamitsu, sendo, sakona bilatu ordez, istorio arin, zuzen eta jostariak idatzi ditu, hizkera zuzena eta umore gordina erabiliz.
Hartu bilduma honetako ipuin bat, paketetik zigarroa hartzen den bezala, eta hasi irakurtzen: emazteak jartzen dizkion adarrak eraman ezinik hura eta maitalea akabatu nahi dituen tipo barregarriaren istorioa topatuko duzu, edo ezkontza-despedidan gogoz kontra puta batengana daramaten gizajoarena; lapurreta guztiz bitxiak, bahiketa are bitxiagoak, edo ustekaberik handiena bukaerarako gordetzen duen ipuin erotikoa…
Harreman sentimentalen lurralde zabal eta labainean dabil Xabier Etxaniz Rojo bere lehenengo ipuin-bilduma honetan. Zapore urbano eta egunerokoa duten istorioak idatzi ditu, bata bestearekin korapilatzen direnak, zigarroak erretzen diren moduan. Eta gure usteen eta errealitatearen artean sortzen diren desadostasunekin jolasten du, tabakoaren kean zehar irudiak desitxuratzen diren antzera.