Sinopsia

Jon Arretxek ohiturik gauzka bere bidaietan oinarrituriko liburuetara: euskal irakurleen artean ezagunak eta arrakastatsuak dira dagoeneko Tubabu, Tuparen seme-alabak eta beste. Oraingoan, berriz, txango baten kronika ez baizik eleberria idatzi digu: nobelako protagonista Nepalen eta Indiako iparraldean barrena dabil, inguruko exotismoaren eta miserien gainetik, barruan irakiten sentitzen dituen galdera existentzialentzako erantzun bat topatu nahian, budismoaren zein hinduismoaren iturri izpiritualetatik edanez, monasterioetako guruengandik nahiz herrietako jende xehearengadik ikasiz, zer nahi duen edo zeren bila dabilen berak ere ez dakien arren.
Bidaiaria idatziz doan egunkaria da eleberriaren bizkarrezurra, baina honen inguruan harilkatuz doaz beste zenbait hari: erdi kolokan utzitako maitasun historia bat batetik, eta egunkari hori irakurtzen ari den pertsonaiaren misterioa bestetik, oroitzapen lanbrotsuen artean. Amaiera arte iritsi beharko du irakurleak, pieza guztiak lotzen dituen puzzlea osatzeko. Betiko idazkera zuzen eta arina darabil hemen ere Arretxek, paraje eta abentura ezezagunetan zehar eskutik garamatzala, baina, itxurazko sinpletasun horren azpian, zehaztasun osoz eraikitako nobela bat ere topatu ahal izango du irakurleak atseginez.